INFOMAX.MK

Додека зимскиот преоден рок кај нас беше исполнет со потпишувања анонимуси за кои ретко кој слушнал, во Хрватска се случија неколку „бомби“ и тоа во таборот на Хајдук, за денеска најава на слична „експлозија“ да дојде и од Загреб.

Сплиќани ги ангажираа Иван Перишиќ од Тотнем и Јосип Брекал од Фиорентина и тоа по директна „кражба“ од најголемиот ривал Динамо Загреб, од каде што сега доаѓаат информации за соодветно силен одговор. Пред вратите на „Максимир“ се најавува искусниот Дејан Ловрен, кој очигледно нема да биде единствениот што ќе се врати меѓу „модрите“, Како што објави „Индекс“, што потоа го потврди и „24сата“, актуелниот хрватски шампион е пред ангажирање на – Лука Модриќ!

На еден од најдобрите играчи од средниот ред на сите времиња следното лето му завршува договорот со Реал Мадрид на лето, а како што стојат работите тој нема да добие понуда за продолжување на соработката. Првиот човек на Динамо, Мирко Баришиќ, наводно стапил во контакт со Модриќ и му кажал дека вратата во неговиот матичен клуб е отворена и дека сите би сакале да го видат во дресот на „модрите“ следната сезона.

Хрватскиот репрезентативец наводно бил заинтересиран за понудата од Загреб, поради што преговорите ќе се интензивираат во наредните недели и големи се шансите тој по 18 години да се врати на „Максимир“. На сите, па и на најверните фанови на Динамо, им е јасно дека Модриќ ќе има многу понуди во текот на летото, претежно од Блискиот Исток и од клубови од МЛС лигата, па јасно е дека барем финансиски Динамо ја губи борбата во таа битка. Не е тајна дека Модриќ планира да игра на Светското првенство во 2026 година, поради што неодамна ја одби понудата на Карло Анчелоти да му се приклучи на стручниот штаб на крајот од сезоната. Целта му е да остане на врвно ниво и да ја заврши кариерата по Мундијалот, што ги зголемува шансите на составот од Загреб, бидејќи таму би работел далеку поквалитетно за разлика од Саудиска Арабија или од САД.