Русија повторно тврди дека има биолабаратории во Украина, но нема докази

Демократите во САД соработуваа со компаниите Биг Фарма и пријателските фондации предводени од Џорџ Сорос и Бил Гејтс за да започнат биолошко истражување во Украина, користејќи го проектот за да генерираат дополнителни средства за изборите, соопшти руската војска во средата на последниот брифинг за биолабораторија.

„Треба да се каже дека идеолозите на американските воени биолошки истражувања во Украина се водачи на Демократската партија“, рече генерал-полковник Игор Кирилов, шеф на руските сили за радијација, хемиска и биолошка заштита.

Владата на САД постави начин за финансирање на воените био-истражувања директно од федералниот буџет, но исто така користеше владини гаранции за собирање средства од „невладините организации контролирани од раководството на Демократската партија“, додаде Кирилов.

Како пример за такви организации, тој покажа слајд со имињата на Фондацијата Бил и Мелинда Гејтс, Фондацијата [Бил и Хилари] Клинтон, Отворено општество и инвестициски фондови на Џорџ Сорос, Фондацијата Рокфелер, Алијансата за екоздравство и Розмонт на Хантер Бајден. Сенека Партнери.

Кирилов, исто така, ги именуваше Pfizer, Moderna, Merck и Gilead како „големи фармацевтски компании“ вклучени во оваа шема, користејќи ја за тестирање лекови додека ги заобиколува меѓународните безбедносни стандарди. Ова ги намалува трошоците за нивното истражување и развој, тврди Кирилов, а зголемувањето на профитот на фармацијата „им дозволува на лидерите на Демократската партија да добијат дополнителни финансиски придонеси за изборните кампањи и да ја сокријат нивната дистрибуција“.

Користејќи ја Украина како полигон ефективно надвор од меѓународната контрола и користејќи ги технолошките капацитети на транснационалните фармацевтски компании, Пентагон „значително го прошири својот истражувачки потенцијал не само во областа на создавање биолошко оружје, туку и добивање информации за отпорноста на антибиотици и присуството на антитела на одредени болести кај популации од одредени региони“, истакна Кирилов.

Шефот на рускиот Истражен комитет Александар Бастрикин минатата недела изјави за РТ дека неговата служба „јасно ги идентификувала“ Американците вклучени во воените биолошки истражувања во Украина, вклучително и вработени во американското Министерство за одбрана и неколку компании поврзани со Пентагон.

САД потрошиле повеќе од 224 милиони долари на биолошки програми во Украина помеѓу 2005 и почетокот на 2022 година, рече Бастрикин.

Руската војска претходно презентираше докази за вмешаност на американската влада во украинските биолаборатории. На крајот на март, Кирилов покажа слајдови кои укажуваат на тоа дека синот на актуелниот американски претседател Џо Бајден Хантер е вклучен во набавката на средства за некои од проектите. Кирилов презентираше и документација која покажа дека Киев е заинтересиран за опремување на беспилотни летала за дистрибуција на вооружени патогени.

За ваквите тврдења на Москва нема никакви докази, ниту пак, истите се потврдени со некакви факти. Официјални потврди нема од украинските власти, ниту пак, од која било друга официјална страна.

Тврдењата дека САД водат тајни биолаборатории во Украина е конспирациска теорија, дело на руската пропаганда уште од 2018 година. Според тој постар наратив, САД работат на доближување на смртоносни патогени близу руската граница и ги тестираат на подрачјето на поранешните советски републики.

Според сервисот за проверка на факти „Раскринкавање“, наводите за американските биолошки лаборатории се појавиле уште во 2015 година. Како пример, го наведуваат текстот на рускиот медиум „Спутник“ во кој пишува дека „Русија ја загрижуваат воените биолаборатории кои САД ги гради во нејзиното окружување“, иако самиот текст не содржи детали или докази дека САД на постсоветско тло навистина гради такви лаборатории.

Објавите погрешно го толкуваат Договорот меѓу САД и Украина од 2005 година, чија цел е да се спречат биолошките закани, а не да се создаваат. Според Договорот од август 2005 година, украинската и американската влада се согласиле да соработуваат за „да го спречат ширењето на опасни патогени и поврзаната експертиза и да ги минимизираат потенцијалните биолошки закани“.

Во мај 2020 година, Службата за безбедност на Украина објави соопштение во кое ги повикува политичарите да престанат да шират лажни информации за постоење на странски воени биолошки лаборатории во Украина.

Неодамна, „лажните вести“ за наводните активности на американските воени биолошки лаборатории во Украина се шират во медиумите и социјалните мрежи… Ниту една странска биолошка лабораторија не работи во Украина. Неодамнешните изјави на поединечни политичари не се точни и се намерно искривување на фактите, се вели во соопштението.

Американската амбасада во Украина преку соопштение во април 2020 година, овие теории ги нарече „дезинформации што се шират во некои кругови во Украина што ги отсликуваат руските дезинформации во врска со силното американско-украинско партнерство за намалување на биолошките закани“.

Како што објави „Дојче Веле“, претходно и Обединетите нации соопштија дека немаат никакви сознанија за наводно производство на оружја за масовно уништување во Украина. Портпаролот на ОН, Стефан Дужарик, изјави дека на Светската организација на ОН за здравје не ѝ се познати „никакви активности на украинската влада кои се спротивни на нејзините преземени обврски преку меѓународните договори, вклучувајќи и хемиски и биолошки оружја.“

Русија лажно тврдеше и дека САД прават тајни експерименти во грузискиот лабораториски центар
Според тинк-тенкот Атлантски совет, руските пропагандисти долго време шират пропаганда во Украина, вклучително и тврдења дека овие лаборатории експериментираат врз граѓаните.

Кода, непрофитна медиумска компанија, во 2018 година објави дека тврдењето е дел од пошироката кампања за дезинформации од страна на Кремљ за дискредитација на САД во очите на руските прозападни соседи, Украина и Грузија.

„Вистиномер“ веќе пишуваше за обвинувањата на руската влада дека Грузија врши тајни експерименти во лабораторијата „Ричард Лугар”, која, според Русија, ја финансисра САД, односно Пентагон. Според Русија, Грузија во оваа лабораторија врши „експерименти за примена на инсектите како преносители на опасни болести“. Кампањата на Русија против лабораторијата „Ричард Лугар“ не е нешто ново и таа трае со години.

Не е првпат Хантер Бајден и Сорос да се поврзуваат со наводни тајни биолаборатории во Украина
Тврдењата дека синот на Џо Бајден, Хантер Бајден, и Џорџ Сорос се поврзани со финансирањето на некакви тајни биолаборатории во Украина не се нови. Русија со вакви обвинувања излезе и во март месец, но истите беа дебанкирани од независните проверувачи на факти. Така на пример, Вашингот пост пишува дека Хантер Бајден се нашол под лупа за деловни зделки во места како Украина и Кина што се случиле додека неговиот татко беше потпретседател. Но, тој не ги „финансирал“ лабораториите во Украина.

Постои проект предводен од САД, познат како Програма за намалување на заканите за соработка, за да им се помогне на поранешните Советски републики да ги трансформираат старите лаборатории кои некогаш биле интегрирани во советската програма за биолошко оружје во најсовремени цивилни биолошки истражувачки објекти. Различни американски компании добија договори од Пентагон да ја вршат таа работа. Еден од тие подизведувачи – релативно помалиот наречен Метабиота – работеше одредена работа во Украина. Таа фирма добила инвестиција од приватна капитална фирма поврзана со Хантер Бајден. Таа инвестиција немаше никаква врска со лабораториите во Украина, пишува Вашингтон Пост во својата анализа.

Москва во своите тврдења за финансирање на овие наводни биолаборатории ги споменува и Џорџ Сорос и неговите врски со Гилеад Сајанс, американска биофармацевтска компанија која беше подизведувач на Пентагон.

Како што пишува Вашинготн пост, Сорос Фонд Менаџмент, инвестициска фирма основана од Сорос во 1970 година, дури во 2010 година поседуваше акции на Гилеад, според податоците на Комисијата за хартии од вредност, заедно со стотици други акции.

Немаме никаква поврзаност со Џорџ Сорос – секое тврдење поинаку е целосно лажно, рече Крис Ридли, портпарол на Гилеад.

Факт е дека во Украина не постојат тајни биолошки лаборатории кои ги финансира САД. Во обид да ја засилат оваа своја конспирациска теорија, Русија лиферува различни верзии од неа, а дел од нив Вистиномер веќе ги има дебанкирано. Бидејќи нема докази за постоење на овие лаборатории, оттука не може да се зборува ниту за некакво нивно финансирање од САД или од демократите. Поврзувањето на имињата на Џорџ Сорос, Хантер Бајден и Бил Гејтс, или пак имињата на некои фармацевтски компании со овие лаборатории не се поткрепени со никакви факти.