INFOMAX.MK

Агенцијата за регистрација одби да го регистрира „Македонскиот културен клуб Никола Вапцаров“ во Благоевград како спротивен на Уставот, соопшти здружението, пренесе БТА. Според основниот закон, граѓанското здружение не може да се занимава со политичка активност.

Клубот ги поднесе документите за основање на 7 февруари. „На 10 февруари добивме отфрлено решение, што значи дека на нашето здружение му се ускратува легитимноста и е надвор од законот“, се вели во пораката од македонскиот клуб дистрибуирана до медиумите.

Ова одбивање ќе го обжалиме пред суд“, соопштија и од здружението, а соопштението го потпишал Атанас Мазнев.

„Сметаме дека ова одбивање е непринципиелно. Во одбивањето е цитиран единствен правен текст – од Уставот на Република Бугарија – чл. 12, ст. 2, дека здруженијата на граѓани не можат да поставуваат политички цели и да вршат политички активности, кои ние, како што може да се види од горенаведените цели, не само што сме ги запазиле, туку дополнително сме напишале експлицитно во статутот на нашето здружение дека немаме за цел вршење политичка дејност. Сепак, имаме одбивање да се пријавиме“, соопштија од клубот.