INFOMAX.MK

Српскиот претседател Александар Вучиќ испрати видео порака за поддршка на Новак Ѓоковиќ и му одговори на австралискиот премиер Скот Морисон.

Да потсетиме, Австралија повторно му ја одби визата на најдобриот тенисер на светот и планира да го протера од земјата. Одлуката за одбивање на визата ја донел министерот за имиграција Алекс Хок. Адвокатскиот тим на Ѓоковиќ најверојатно ќе поднесе жалба на одлуката.

Еве што меѓу другото вели Вучиќ во видео пораката.

„Се соочуваме со многу проблеми и бројни притисоци во регионот и од делови од светот. Но, нашиот народ никогаш не бил лишен од гордоста, срцето и достоинството. Ова го велам поради се` што се случува во Мелбурн. Напади и притисок врз Ѓоковиќ , Србин, станаа преголеми за да не одговорам.

Веројатно не би кажал ниту збор доколку австралискиот премиер Скот Морисон не контактира со Новак Ѓоковиќ откако му беше укината визата. Тој рече дека е задоволен и ја поздравува одлуката. Зачуден сум што властите можат да донесат такви одлуки над одлуката на судот“.

„Замислете како би изгледало овде. Моралното прашање е многу поважно. Ако сакавте да му забраните на Ѓоковиќ да го освои турнирот по десетти пат, зошто не го сторевте тоа веднаш? Зошто го малтретирате не само него туку и неговото семејство. Дали ви е потребно да ги добиете изборите?

Овде се појави претседател од мала држава кој може да му го каже тоа на премиерот на голема држава. Ќе се бориме за Новак Ѓоковиќ и тоа што ќе го малтретирате ден, два-пет нема да ни го промени ставот за Ѓоковиќ. Можете да напишете стотици најлоши текстови за него, но тој ќе остане најдобриот тенисер на сите времиња и секогаш ќе биде во нашите срца“.

„А вие, кои мислите дека со тоа што ќе постигнете нешто што ќе го постигнете, никогаш нема да му пријдете на Новак Ѓоковиќ, туку на кој било обичен човек и на вашиот и на нашиот народ. Србија ќе биде со Ѓоковиќ и ќе знае како да одговори така што ќе се однесува многу подобро отколку што се однесувате кон него. Да живее Србија. Новак, ние сме со тебе“, заклучил Вучиќ.