Во Црна Гора се апсат поранешни министри

Двајцата поранешни црногорски министри за земјоделство, Милутин Симовиќ и Петар Ивановиќ, денеска се уапсени од припадници на Специјалното полициско одделение (СЈО), по налог на Специјалното државно обвинителство на Црна Гора за организиран криминал, објавија медиумите во Подгорица.

Според информациите на весникот „Вијести“, двајца поранешни министри се осомничени за незаконски плаќања од буџетот за земјоделство. Од 2016 до 2020 година, Милутин Симовиќ беше министер за земјоделство и рурален развој и потпретседател на црногорската влада во времето кога Душко Марковиќ беше премиер.

Петар Ивановиќ беше министер за земјоделство и рурален развој од 2012 до 2016 година, а потоа беше пратеник. Од 2018 до 2023 година бил економски советник на поранешниот претседател на Црна Гора, Мило Ѓукановиќ. Ивановиќ е уапсен во куќа во Подгорица, а полицијата во моментов претресува вили, имоти и лозје во негова сопственост.

Во истата акција е уапсен и поранешниот државен секретар на Министерството за земјоделство и рурален развој, Немања Катниќ. Уште претходно, Вишиот суд во Подгорица го потврди обвинението против Ивановиќ за аферата со фондот Абу Даби, во која тој е обвинет за злоупотреба на службената положба.

Во 2015 година, Фондот за развој на Абу Даби, државна агенција на Обединетите Арапски Емирати, обезбеди заем од 50 милиони долари за поттикнување на земјоделството на северот на Црна Гора. Обвинението на СДТ го обвинува Ивановиќ за малверзации при распределбата на тие пари. Специјалното државно обвинителство на Црна Гора се уште не излезе со официјално соопштение во врска со овој случај.

Share on Facebook

Tweet

Follow us

Save