Груевски: Славењето на хероите ќе создаде нови херои – Нека е честит македонскиот национален празник Илинден!

Честитка по повод Илинден објави поранешниот премиер Никола Груевски.

– Честит јубилеј – 80 години од првото заседание на АСНОМ кое беше круна на антифашистичката борба преку масовното движење на македонските партизани, предводени од комунистичката партија на Македонија, и заседание на кое се поставија темелите на македонската државност.

Честита 121 година од почетокот на најславното македонско народно и масовно востание организирано од македонската револуционерна организација – Илинденското востание! Востание кое беше македонско и општонародно и кое подоцна беше и инспирација на македонските партизани и нивното востание и борба против фашизмот и окупацијата, а за слободна држава и независност!

Два датуми кои не потсетуваат дека илјадници храбри борци во овие генерации Македонци и борци од другите етнички заедници во Македонија, доброволно ги положувале своите животи, борејќи се и жртвувајќи се за слободата на Македонија, за нејзината независност и државност.

Тоа ги обврзува сите генерации по нив, вклучително и денешната, но и идните, да ја чуваат, бранат, унапредуваат, зајакнуваат и развиваат Македонија и нејзината слобода и сувереност, да ја јакнат правдата и благосостојбата на населението.

И да ги слават хероите, бидејќи славењето на хероите ќе создаде нови херои.

Нека е со среќа празникот Свети Илија и честит именден на оние кои го носат неговото име!

Нека е честит македонскиот национален празник Илинден!

Нека е вечен празникот и нека биде вечна Македонија! – напиша Груевски на Фејсбук.