ДОБРА ВЕСТ: Грција официјално го регистрираше центарот за македонски јазик!

Центарот за македонски јазик е официјално регистриран во Грција. Одлуката со задоволство беше примена во Македонија каде се оценува како чин на де факто признавање на македонското говорно население во Грција, велат од Центарот за македонски јазик.

Одлуката ја соопшти Центарот за македонски јазик во Грција, кој информираше дека официјално е регистриран како невладина организација (НВО) од страна на судските власти во Грција. Барањето за регистрација на организацијата беше одобрено од страна на судот на 28 јули 2022 година, додека одлуката беше објавена во Билтенот за судски одлуки и публикации на 7 ноември 2022 година.

Последните административни работи поврзани со регистрацијата биле завршени минатата недела, при што судот официјално го одобрил и статутот на организацијата. Станува збор за прва невладина организација во Грција, која директно ќе се грижи за македонскиот јазик и која законски е регистрирана од страна на грчките државни органи. „Овој чин претставува де факто признавање на македонското говорно население во Грција“, оценуваат од Центарот.

Одлуката на судот претставува прво официјално признавање на македонскиот јазик во Грција од државните органи после пописот на населението во Грција спроведен во 1920 година. Центарот најавува дека во наредниот период ќе се насочи кон исполнување на своите цели од Статутот кои предвидуваат изучување на македонскиот литературен јазик од страна на граѓаните на Грција, преку интернет-страница, поддршка на заложбите за идно воведување на македонскиот литературен јазик како изборен предмет во јавните училишта, како и поддршка на заложбите за идно формирање на педагошки училишта/одделенија во рамките на постоечките универзитети во Грција за обука на наставници по македонски јазик, како и за изработка на наставни програми и наставни материјали.

Точниот број на македонски говорници во Грција не е познат, бидејќи податоците за јазичната разновидност не се собираат во националниот попис. Меѓутоа, македонскиот јазик традиционално се зборува (во различен степен) во многу градови и во стотици села, дваесетина општини во земјата.
Според нашиот статут, една од нашите главни цели е да го поддржиме идното воведување на македонскиот стандарден јазик како изборен предмет во државните училишта (основни и средни) и универзитетите во Грција, лоцирани во регионите на Западна Македонија, Централна Македонија и Источна Македонија, Македонија, Македонија и Тракија. Дополнително, го поддржуваме идното формирање на педагошки училишта/одделенија на постоечките универзитети во Грција за развој на локални наставници по македонски јазик, како и наставни програми и наставни материјали, велат од Центарот за македонски јазик од каде побараа македонскиот јазик да се изучува во училиштата во местата каде има етнички Македонци во Грција.

Претходно јавното обвинителство во Лерин поднесе тужба за укинување на Центарот за македонски јазик, а обвинителката се повикува на Преспанскиот договор според кој, како што вели таа, нема Македонци надвор од територијата на Република Македонија и дека во Грција постои обид вештачки да се произведе македонско малцинство.

Share on Facebook

Tweet

Follow us

Save