Добро утро со Инфомакс: Македонијо, ти не си име прочитано од книга, ти си крв, коски и мајчино млеко!

Лазо Каровски е еден од првите македонски поети по ослободувањето, романописец, детски поет, литературен историчар и фолклорист.

По завршувањето на гимназијалното образование во родниот град и во Скопје, дипломирал на Катедрата за југословенски литератури и македонски јазик на Филозофскиот факултет во Скопје, каде што и докторирал со темата „Печалбарството во македонската народна и уметничка литература“ (Македонски печалбарски песни), во 1973 година.

Работел како гимназиски професор во Кавадарци и во Учителската школа во Битола, а потоа предавал на тамошната Педагошка академија.

Добро утро Македонци, уживајте во “Македонија”

– МАКЕДОНИЈА (Лазо Каровски)

Македонијо

ти не си име прочитано од книга

ни збор чуен од дедовци

ти си крв, коски и отров

Крв, коски и мајчино млеко,

Зашто сум го прочитал твоето име

испишано на мрачниот небосклон

од пожарите на запалените села

испишано врз крајбрежните карпи

од страста дива на незадржливите бранови

Зашто сум ја осетил до горда болка

смислата на жилавото ракување со историјата,

кој во тебе мајко како освојувач стапнал

бос среде трње сред жариште цапнал

Вторпат тој нема да го пречекори прагот

па макар за назад,да побара трага.

Маченичко,

одев по твоите долишта – раскроени перушки

и ги собирав коските изгниени

од дедовците, од другарите,

за да ги закопам во еден гроб

за да ги соберам во моето срце.

Поминав низ твоите бури

Самоилови, Карпошови

Илинденски и Партизански,

ветриштата ми ги наглотија

и закрвавија очите.

но ми ги избистри ѕвездениот кристал

на твоите небесни незгаснати јасници.

Македонијо,

ти не си име прочитано од книга

ни збор чуен од дедовци

ти си крв,коски и отров.

Крв, коски и мајчино млеко.