Добро утро со Инфомакс: Се лепи милениумски низ нашите изморени стапалки – МАКЕДОНЦИ!

Гане Тодоровски е поет, преведувач, есеист, литературен критичар, историчар, публицист. Роден е на 11 мај 1929 година во Скопје. Завршил Филозофски факултет на Универзитетот „Св. Кирил и Методиј“ во Скопје каде што и докторирал на темата „Веда Словена и нејзините мистификатори“. Работел како новинар во Танјуг, „Млад борец“ и „Студентски збор“. Бил долгогодишен професор по хрватска литература и македонска литература – 19 век на Филолошкиот факултет во Скопје. Бил претседател на ДПМ (1969-1971 и 1985/86), претседател на Советот на СВП (1970-1971) и бил одговорен уредник на списанието „Млада литература“. Амбасадор на Република Македонија во Руската Федерација. Член е на ДПМ од 1951 година. Член на Македонскиот ПЕН центар.Член на МАНУ.

Добро утро Македонци, уживајте во “Нашинска (III)”

НАШИНСКА (III)

Сѐ тече и сѐ протечува

А ние одиме одиме одиме

Минејќи преку минливото

Одејќи низ недоодливото

А едно густо име

Со многу жилки од животек

Слоевито и збито и деветорно

Се лепи милениумски

Низ нашите изморени стапалки:

М а к е д о н ц и!

Ем-Ма-ем-ке-ем-дон-ем-ци

Ем-донци-маке-ем-кедон-маци

Ем-донма-цике-ем-цима-донке

Вртени превртувани извртувани

Делени разделувани раскинувани

На слогови на маки и на фили

На егеи на вардари на пирини

Ослепени еднооки видовити

Кучкини синови ѓаволско соило црно семе

Мијаци брсјаци копановци

Мрваци бандовци пуливаковци

Икари и прометеи топовско месо

Гробари на својот грев и очај

Крадачи на сопствената вера

По првпат Питу по вторпат Питу

Итромани дудуци лесноверци

Последни претплатници на слогата

Одиме се пореваме се исправаме

Се извишуваме подзастануваме продолжуваме

Преку кресни илиндени грамоси

Преку беаскули подрумкалиња черни џамии

Преку лепоглави сремски митровици

Преку голиотоци и сибири

.

Одиме одиме одиме

.

За да се доболи болливото

За да се догледа гледливото

За да се доосвои најсвоето

.

Одиме одиме одиме

.

Со препал и со уплав

Да не би да се испогубиме

Низ маглата на вековите —

.

Одиме своеглаво одиме упорито

Одиме прекутрупа одиме гласовито

Преку бришаниот простор на постоењето

Одиме одејќи накај себеси

Нашински препознавајќи се —

Нашински престигнувајќи се —

Нашински издржувајќи.