Европа смисли како да му се одмазди на Трамп: Ако не може со преговори, може со контрамерки

Европската комисија во среда треба да објави контрамерки на американските царини за увоз на алуминиум и челик од 25 отсто, кои треба да стапат на сила на 15 април.

Со дополнителни анализи и консултации со земјите членки, ќе се одлучи со каков одговор ќе возврати Брисел на американските царини од 25 отсто за автомобили и 20 отсто за останатите увозни стапки од ЕУ. Ако не се реши преку преговори, ќе следат контрамерки.

Европските лидери викендов размислуваа како да се одговори на одлуката на американскиот претседател Доналд Трамп, кој минатата недела најави смрт на слободната трговија и најави општи царини од 10 отсто за целиот увоз во САД, плус дополнителни царини од 50 отсто за одредени земји. Британскиот премиер Кир Стармер изјави дека е подготвен да преземе мерки за заштита на британскиот бизнис од царинската бура. Тој во телефонски разговор со францускиот претседател Емануел Макрон, се согласиле дека трговската војна не е во ничиј интерес, но „ништо не треба да се исклучи“, пренесува Би-би-си.

Британската влада подготви список на американски стоки кои би можеле да бидат предмет на контрацарини. Стармер предлага државна интервенција за заштита на националните интереси.

Поради одлуката на Трамп и одговорот на Кина, која ѝ возврати на Америка со царини од 34 отсто, следеше драстичен пад на берзите. Економистите предупредуваат дека трговската војна може да ја турне целата светска економија во длабока криза.

Но и покрај паниката во светот поради новите „правила на игра“ кои ги постави Трамп, тој сепак во негов стил ги смирува сите.

„Издржете – нема да биде лесно, но крајниот резултат ќе биде историски. Ова е економска револуција и ние ќе победиме“, увери Трамп на својата социјална мрежа „Truth Social“.

Во исто време, советникот на Трамп и извршен директор на „Тесла“, Илон Маск, излезе со изненадувачка поддршка за слободната трговија, посочувајќи дека се надева оти на крајот Европа и САД ќе се согласат и ќе се вратат на нула царински стапки. Говорејќи преку видео врска до конгресот на италијанската крајнодесничарска Лига на вицепремиерот Матео Салвини, тој повика на создавање зона за слободна трговија меѓу САД и ЕУ. Маск изгуби милијарди откако Трамп ги објави царините во вторникот. „Тесла“ се потпира на увезени делови од Кина, на кои Трамп воведе царина од 34 проценти, покрај претходните 20 проценти.

Со воведувањето царини, Трамп ги враќа САД еден век наназад во однос на протекционизмот, анализира Би-би-си. Тој им сврте грб на темелите на американската економска моќ: оваа недела не гледавме само како САД започнуваат глобална трговска војна или поттикнуваат пад на берзата. Станува збор за велесила која силно го сврте грбот на процесот на глобализација за која се залагаше и од која богато профитираше во последните децении, со што погази некои од темелите на економијата и дипломатијата. Штом една земја продава повеќе стоки на САД отколку што купува, според толкувањето на Трамп, тоа е измама и заслужува царина. Во исто време, САД имаат трговски суфицит од 280 милијарди долари во секторот финансиски услуги или социјалните мрежи.

Европската комисија може сериозно да ги нападне технолошките милијардери кои силно ја поддржаа кампањата на Доналд Трамп – размислува да ги оданочи дигиталните услуги на технолошките компании како „Епл“, „Амазон“, „Мета“ или финансиските услуги како „Пејпал“.

Share on Facebook

Tweet

Follow us

Save