Ердоган откри кога Парламентот ќе одлучува за влез на Шведска во НАТО

Турскиот претседател Реџеп Таип Ердоган во понеделникот изјави дека парламентот на земјата ќе ја разгледа апликацијата на Шведска за влез во НАТО во октомври.

„Кога парламентот ќе продолжи со работа по летната пауза ќе направиме се што е потребно, а пратениците ќе ја разгледаат апликацијата на Шведска. Конечната одлука е на пратениците“, рече претседателот во обраќањето по состанокот на владата.

Тој истакна дека Анкара е подготвена да ги реши сите проблеми преку дијалог.

Ердоган истакна дека Анкара јасно ги изразила своите очекувања до Стокхолм во однос на борбата против тероризмот и исламофобијата.
Турција сè уште не го одобрила членството на Шведска во НАТО, туку само се согласила да го отвори патот кон процесот, изјави претходно Омер Челик, портпарол на турската владејачка Партија на правдата и развојот.

На 10 јули, Ердоган, во пресрет на почетокот на самитот на НАТО во Вилнус, рече дека влезот на Шведска во алијансата ќе стане возможен откако Турција ќе биде примена во ЕУ. Подоцна истиот ден, генералниот секретар на НАТО Јенс Столтенберг рече дека Ердоган се согласил „што е можно поскоро“ да испрати документи за ратификување на апликацијата на Шведска за членство во НАТО до турскиот парламент, а Стокхолм и ветил на Анкара дека ќе и помогне на нејзиниот пат кон Европската унија. Во исто време, претседателот на Големото народно собрание на Турција, Нуман Куртулмуш изјави дека се уште не е одреден рокот за поднесување на апликацијата на Шведска за влез во НАТО до турскиот парламент. Покрај тоа, пратениците во турскиот парламент заминаа на летен одмор од 1 јули до октомври, но Комисијата за надворешни работи на парламентот нема да оди на одмор поради можното разгледување на апликацијата на Шведска за влез во НАТО.
Финска и Шведска, на позадината на настаните во Украина во мај 2022 година, поднесоа барање за приклучување кон алијансата. Финска стана 31-ва членка на НАТО на 4 април.

Апликацијата на Шведска сè уште не добила конечно унгарско и турско одобрение. Шведска, како членка на Европската унија, во преговорите со Ердоган во Вилнус пред самитот на НАТО, се согласи, во замена за ратификација на апликацијата, да помогне во интензивирањето на процесот на пристапување на Турција во ЕУ. Истовремено, генералниот секретар на НАТО нагласи дека во принцип прашањата за приемот на Шведска во НАТО и приемот на Турција во ЕУ „не се поврзани едно со друго“.

Share on Facebook

Tweet

Follow us

Save