ЕУ изрази жалење што Руската Дума донесе закон за забрана на ЛГБТ пропаганда

Европската унија изрази жалење за усвојувањето од страна на Државната дума на Руската Федерација на законот за забрана на ЛГБТ пропагандата и воведување дополнителни ограничувања за странски агенти, а исто така изрази загриженост поради предложените измени на законот за државјанство.

„Европската унија ја изразува својата солидарност со руските граѓани кои се лишени од нивните човекови права“, се вели во соопштението на Европската служба за надворешни работи.

Според ЕУ, новите закони „ја охрабруваат хомофобијата и го зајакнуваат сузбивањето на критичкиот и алтернативниот дискурс“.

За потсетување, вчера Државната Дума едногласно усвои пакет закони со кои се забранува ЛГБТ пропаганда, педофилија и промена на полот во Русија и ставање на таквите информации на списокот забранет за деца.

Документот ќе опфаќа рекламирање, книги, филмови и аудио-визуелни услуги.

Поточно, кога законите ќе стапат на сила, ќе биде забрането издавање сертификати за дистрибуција на филмови кои промовираат нетрадиционални сексуални односи и преференции, како и промена на полот.

Исто така, ќе биде невозможно да се продаваат стоки, вклучително и странски, со слична содржина.

За непочитување се предвидени високи казни.

Значи, граѓаните ќе треба да платат до 400 илјади рубли за ЛГБТ пропаганда, правните лица – до пет милиони. Странците исто така може да се соочат со 15 дена административен притвор или депортација.

За ширење информации меѓу малолетници кои покажуваат нетрадиционални сексуални односи и тенденции или што може да ги наведат да го променат полот, ќе бидат казнети со парична казна до 200 илјади рубли, а правните лица до четири милиони рубли.

Роскомнадзор ќе има право да одобри процедура за следење на Интернет за да се идентификуваат информации и програми до кои треба да се ограничи пристапот.