ЕУ ѝ одобри на Украина заем од милијарда евра

Европскиот совет и додели на Украина дополнителен заем од една милијарда евра „како итен случај“ и вети дека ќе обезбеди дополнителна помош за Киев „во следните месеци“.

Според соопштението на Советот, вкупната макрофинансиска поддршка на ЕУ за Киев од крајот на февруари, кога Москва ја започна својата воена операција, сега достигна 2,2 милијарди евра.

Заемот треба да „и обезбеди на Украина потребните средства за покривање на итните потреби и да се обезбеди функционирање на критичната инфраструктура“, рече чешкиот министер за финансии Збинек Станјура.

Чешката Република во моментов претседава со Советот на ЕУ.

Потпретседателот на Европската комисија Валдис Домбровскис ја поздрави одлуката, велејќи дека „Украина е во економска војна“, дека „очајно и треба“ краткорочна помош.

„ЕУ е тука да помогне“, додаде Домбровскис.

Европскиот парламент ја одобри распределбата на средствата на 7 јули.

Помошта ќе биде пуштена откако ќе се договори меморандум за разбирање со украинските власти.

Заемот е дел од „многу концесионален“ долгорочен заем предложен од Европската комисија на 18 мај. Девет милијарди евра „ќе го надополнат значителното краткорочно олеснување што беше обезбедено досега, со нова вонредна макрофинансиска помош“ за Украина, објасни тогаш претседателката на Европската комисија Урсула фон дер Лајен.

Сепак, според Corriere de la Sera, Германија го блокираше пакетот помош повеќе од еден месец.

На германскиот министер за финансии Кристијан Линднер не му се допаѓа понудата на Брисел за финансирање на Украина од заеднички фондови, додавајќи дека Берлин засега се согласил да одобри само транша од милијарда евра.

Украинскиот министер за финансии Серхи Марченко вчера објави дека членките на ЕУ не се согласуваат како треба да ја поддржат Украина и дека некои од нив сметаат дека девет милијарди евра се премногу.

Марченко, исто така, рече дека иако на Украина и се потребни пет милијарди евра секој месец, Киев досега добивал многу помалку. Коментарите доаѓаат откако тој во средината на мај објави дека Украина можеби ќе треба да прибегне кон „болни“ мерки за да ја спаси економијата во услови на судир со Русија. Во тоа време, тој предупреди дека владата можеби ќе треба да ги зголеми даноците, да ги намали трошоците и да национализира одредени бизниси.