ЕХФ се огласи за натпреварот Алкалоид – АЕК: За одлука уште ќе се чека!

Европската ракометна федерација (ЕХФ) во вторникот соопшти дека ја предала целата релевантна документација што ја поседува до своите правни тела и побарала иницирање на правна постапка против Алкалоид и АЕК.

Овој чекор следува поради инцидентот што се случи во неделата, на 25 мај, кога не се одигра реванш натпреварот од финалето на ЕХФ Европскиот Куп во машка конкуренција меѓу двата клуба.

Според соопштението на ЕХФ, доставената документација до правните органи се однесува, меѓу другото, на дистрибуцијата на билети за гостинските навивачи од страна на Алкалоид во деновите пред натпреварот, како и на одбивањето на АЕК Атина да излезе на теренот за почетокот на натпреварот.

И двата клуба се повикани да достават свои изјави и информации кои ќе бидат земени предвид од правните тела на федерацијата.

Од ЕХФ нагласуваат дека дополнителни информации ќе бидат објавени дури откако ќе биде донесена правна одлука.

Share on Facebook

Tweet

Follow us

Save