INFOMAX.MK

Заменик-градоначалникот на Прилеп гради дивоградба, уништува споменик на културата, а никој не реагира?!

Актуелниот член на Советот на Општина Прилеп и заменик-градоначалник, Диме Бозоски без одобрение за градба и спротивно на сите одлуки на општинската администрација си гради врз објект кој е заштитено културно наследство.

Не е првпат Безоски да не го почитува Законот и да гради на диво.

Од документацијата во која Инфомакс имаше увид, постојат низа акти кои Општина Прилеп, кои нагласуваат дека се работи за незаконска градба.

Во септември 2021 година општинскиот инспектор го опоменува заменик-градоначалникот дека објектот е нелегален и веднаш треба да се отстрани, во спротивно ќе биде отстранет од страна на општинските органи.

Во решенија општината нагласува дека објектот нема одобрение за градба, го опоменува Безоски, но очигледно по промената на локалната власт и со доаѓањето на ВМРО-ДПМНЕ на власт, никој не преземал ништо за отстранување на објектот.

За овој случај веќе има и пријава од Левица.

– Левица Прилеп поднесе пријава до Општина Прилеп за вршење вонреден инспекциски надзор поради незаконски градежни активности на објект кој се наоѓа на улица Браќа Ламески бр. 6 во Прилеп. Овој објект, познат како камен магацин или сегашно „Просперо“, според својата архитектонска вредност и историска важност, претставува заштитено културно наследство.

„Со оваа пријава сакаме да алармираме за незаконско градење и интервенции на објект кој претставува заштитено културно наследство“, изјавија од Левица Прилеп. Според партијата, на локацијата се забележани градежни активности без јасно истакната дозвола за градба и без видлива согласност од надлежните институции за заштита на културни добра. Ваквите интервенции, како што тврдат од Левица, вклучуваат доградување и реконструкции кои ја нарушуваат автентичноста и естетскиот изглед на објектот, со што се прекршуваат законите за урбанистичко планирање и Законот за заштита на културното наследство.

Дополнително, од партијата предупредуваат дека ваквата интервенција создава опасност за безбедноста на околината, со оглед на тоа што делови од зградата се оставени во полураспадната состојба. Левица Прилеп ги повикува надлежните институции да излезат на терен и да извршат инспекциски надзор. Тие исто така бараат преземање соодветни мерки, вклучително и стопирање на сите незаконски градежни активности и поведување постапка против одговорните лица.

Исто така, Левица Прилеп укажува на вмешаноста на заменик-градоначалникот на Општина Прилеп, Диме Бозоски, во овие активности. Партијата бара институциите да преземат соодветни мерки и да спречат понатамошни неправилности во процесот на градба. – стои во соопштението на партијата.

Безоски инаку изразува желба за кандидирање за градоначалник на Прилеп, објавија претходно локалните медиуми кои го опишаа како „бизнисмен и хуманист“, но не и како некој кој бесправно гради објект.

Бозоски е активен член на ВМРО-ДПМНЕ од 2004 година. Од 2010 до 2012 година бил претседател на партиската комисија за економија, во 2021 година станува дел од Советот на општина Прилеп, а од 2024година ја извршува функцијата Заменик градоначалник на општината.