INFOMAX.MK

Украинскиот претседател Володимир Зеленски доцна синоќа во своето новогодишно обраќање до нацијата, изјави дека Украина сака крај на војната, но не по секоја цена. Тој нагласи дека нема да потпише „слаб“ мировен договор што само ќе послужи за продолжување на конфликтот, објави Би-би-си.

Седејќи во својата канцеларија со празнична елка во позадина, Зеленски во 21-минутен говор објавен непосредно пред полноќ рече дека Украинците се исцрпени по речиси четири години војна – подолго од германската окупација на многу украински градови во Втората светска војна.

И покрај ова, нагласи тој, тие не се подготвени да се откажат.

„Што сака Украина? Мир? Да. По секоја цена? Не. Сакаме крај на војната, но не и крај на Украина“, рече Зеленски, облечен во традиционална украинска кошула во темно зелена боја. „Дали сме уморни? Многу уморни. Дали тоа значи дека сме подготвени да се откажеме? Секој што мисли така, длабоко греши“, додаде тој.

Зеленски предупреди дека секој потпис „ставен на слаби договори само ја поттикнува војната“.

„Мојот потпис ќе биде ставен на силен договор. И токму за ова се работи на секој состанок, секој телефонски повик, секоја одлука“, рече тој. „Да се обезбеди силен мир за сите, не за еден ден, една недела или два месеци, туку мир со години“.

Според него, неделите дипломатија предводена од САД, вклучувајќи ги и неговите разговори со Доналд Трамп минатиот викенд во Флорида, резултираа со мировен договор кој е речиси финализиран.

„Мировниот договор е 90% готов, остануваат 10%“, рече Зеленски. „Тие 10% содржат сè, тие 10% ќе ја одредат судбината на мирот, судбината на Украина и Европа и како ќе живеат луѓето“.

Територијална главна пречка

Главната пречка за завршување на договорот останува прашањето за контрола врз украинската територија. Русија моментално држи околу 19% од територијата на југот и истокот од земјата, а рускиот претседател Владимир Путин бара Украина да се повлече од делови од источниот регион Донбас што силите на Москва не успеаја да ги освојат.

Од друга страна, Киев инсистира на замрзнување на сегашните борбени линии. Зеленски ги отфрли руските барања за целосно повлекување од Донбас како „измама“.

„Дали некој сè уште им верува? За жал, да“, рече тој. „Бидејќи премногу често вистината се избегнува и се нарекува дипломатија, кога всушност таа е едноставно лага облечена во деловни костуми“.