Излезноста на изборите во Унгарија до 11 часот наутро значително поголема отколку на претходните избори

До 11 часот наутро, излезноста на изборите е 37,98 проценти, соопшти унгарската изборна комисија. Ова е значително повисоко отколку на претходните парламентарни избори – во 2022 година, излезноста била 25,77 проценти, а во 2018 година, 29,93 проценти до 11 часот наутро.

Гласачките места во Унгарија се отворија во 6:00 часот наутро,а се затвораат во 19:00 часот. Унгарската изборна комисија објави излезност од 16,89 проценти, а излезноста во Будимпешта е 15,96 проценти до 9 часот.

Според анкетите на јавното мислење, главни соперници се партијата Фидес на актуелниот унгарски премиер Виктор Орбан и проевропската партија Тиса, предводена од Петер Маѓар. На изборите, кои се одржуваат во 106 изборни единици, ќе бидат избрани 199 членови на Унгарското национално собрание. Се очекува Националната изборна канцеларија да ги објави прелиминарните резултати во изборната ноќ, а рокот за објавување на изборните резултати е 18 април, а конечните резултати треба да бидат објавени до 4 мај.

За партиите, прагот за влез во парламентот е пет проценти од гласовите. Унгарскиот премиер го избира парламентот, со просто мнозинство, а унгарскиот претседател поднесува предлог за премиер, кој обично е кандидат на партијата што ги добила изборите, а потоа парламентот гласа за номинацијата. Доколку парламентот не успее да го избере предложеното лице, претседателот поднесува нов предлог во рок од 15 дена, а доколку парламентот повторно не успее да избере нов премиер, претседателот може да го распушти парламентот и да распише нови избори.

Share on Facebook

Tweet

Follow us

Save