Изменет сообраќаен режим кај надвозникот „Влајко“ поради испитување на статиката

Во населбата Влае кај надвозникот „Влајко“ од денеска ќе биде воведен изменет сообраќаен режим поради започнување на активности за статичко испитување на конструкцијата. Како што соопштуваат од Општина Карпош, работите ќе се реализираат во две фази, со затворање на делови од булеварот „Партизански одреди“ по принципот лента по лента.

-Во првата фаза се предвидува затворање на дел од сообраќајницата, односно булеварот „Партизански одреди“, по принципот лента по лента, во насока исток – запад, поточно во правец кон населбата Ѓорче Петров. По завршување на првата фаза, ќе следи затворање на сообраќајот во насока запад – исток, (кон Центар), исто така по принципот лента по лента, стои во соопштението од Општина Карпош.

Сообраќајот ќе се одвива непречено, согласно поставената сигнализација и опрема, со ограничување на брзината од 30 километри на час.

Работите се предвидува да траат седум работни дена, по што ќе биде воспоставен редовниот режим на сообраќај.

Share on Facebook

Tweet

Follow us

Save