Имало единство во ЕУ? Франција го напушта Договорот за енергетска повелба!

Франција ќе го напушти Договорот за енергетска повелба, најави претседателот Емануел Макрон. Со оваа одлука земјата станува најголемата економија која објави дека се откажува од контроверзниот договор, објави Политико.

Пактот им дозволува на меѓународните компании и инвеститори да ги тужат владите за мешање што влијае на профитот од енергетските проекти. Сè повеќе се гледа како закана за националните климатски планови.

„Франција одлучи да се повлече од Договорот за енергетската повелба. Прво, ја донесовме оваа одлука затоа што е во согласност со позициите што ги зазедовме, а особено со Парискиот договор и она што тој го подразбира“, рече Макрон.

Договорот за енергетска повелба е потпишан во 1994 година и има повеќе од 50 потписници, вклучително и оние од Европската унија, и има за цел да ја промовира „меѓународната соработка во енергетскиот сектор“. Но, договорот беше критикуван за заштита на компаниите за фосилни горива од владините регулативи кои би можеле да влијаат на нивните потенцијални приходи.

На пример, германската енергетска компанија RWE ја тужеше холандската влада во 2021 година за отштета од 1,4 милијарди евра поради одлуката за постепено укинување на јагленот.

Самата Холандија претходно оваа недела објави дека ќе се повлече од договорот. Планираат да заминат и Шпанија, Полска и Германија. Италија се повлече во 2016 година.

Во јуни 2022 година, беше постигнат договор за измена на договорот, при што Европската комисија рече дека изменетиот договор „ќе ги олесни одржливите инвестиции во енергетскиот сектор“.

Одлуката на Макрон да ја повлече Франција од договорот дојде откако Високиот совет за климата на Франција рече дека координираниот излез ќе биде „најмалку ризичната опција за исполнување на националните, европските и меѓународните обврски за климата“.

„Треба да ги забрзаме инвестициите во обновливите извори на енергија и нуклеарната енергија“, коментира францускиот претседател.

Share on Facebook

Tweet

Follow us

Save