Интерес за вакцинација против Ковид-19 нема ама властите ќе набавуваат половина милион дози

Доцнат детските вакцини против Ковид кои требаше да стигнат до април. Се уште не се знае дали и кога ќе бидат испорачани планираните 10.000 дози Фајзер за деца од 5 до 11 години. Тие се дел од половина милион вакцини кои лани ги резервираше државата од овој производител. Неофицијално здравствените власти планираат да ја преполоват количината и да купат околу 200.000, но не се откажуваат од педијатриските дози.

Во меѓувреме во државата има 380.000 вакцини Фајзер. Поголемиот дел имаат краен рок до август, а на дел рокот им истекува на крајот на мај и јуни.

– Со цел континуирано и навремено обезбедување доволно количини вакцини и да не дојде до недостиг од истите, како и следејќи го интересот за вакцинација во процес сме на обезбедување дополнителни количини вакцини за деца и за возрасни, согласно проценките за потребите од страна на стручните лица, одговорија од министерството за здравство.

Инаку досега се уништени 67 илјади вакцини против Ковид со поминат рок, а во постапка за уништување се уште десетици илјади дози.

Со намалувањето на бројот на новозаразени и со укинување на ковид мерките значително падна интересот за вакцинација. Според податоците од ИЈЗ минатат недела прва доза примиле само 65 граѓани.

Извор: Сител

Share on Facebook

Tweet

Follow us

Save