INFOMAX.MK

Половина од бензинот го ставивме во „кангуто“, а половина беше наменет за палење на „цитроенот“. Палчо го посипа бензинот, а Боре фрли чкорче и се запали „цитроенот“. Веднаш потоа влеговме во „кангуто“ за да се вратиме во штабот, сведочеше Влатко Кешишев во судница, објаснувајќи што според него се случувало откако била убиена 14-годишната Вања Ѓорчевска.

Кога Палевски стигнал во Турција после убиствата, Кешишев на телефон му кажал дека во штабот врие од полиција.

-Само што слушна дека му кажав оти овде врие од полиција ми го спушти телефонот – рече Кешишев.

Обвинителството го праша Кешишев како се согласил да работи без пари во партијата Десна кога зад себе Кешишев имал големо искуство како готвач во Германија, Швајцарија и дали било логично да не прима надомест за повеќегодишниот ангажман во партијата.

-Прифатив од патриотски причини – рече Кешишев и потврди дека од октомври 2021 до 2023 живеел без пари а сѐ им плаќале членови и симпатизери на Десна – храната и сите сметки биле платени од нив.

Велибор Манев дури подоцна, кога ја ископале дупката во која заврши животот на Панче Жежовски – му кажал дека е за киднапирање луѓе, а Кешишев додека копал, според неговите зборови, мислел дека копаат за да најдат злато.

– Палчо и Вељо го одбрале местото за копање на таа дупка – рече Кешишев.

Кешишев потврди дека видел пиштол во седиштето на партијата Десна и тоа истиот што подоцна му го зеде полицијата на Палевски кога копале злато во Демир Капија на 05.05.2023 година.