INFOMAX.MK

Премиерот Димитар Ковачевски по седницата на Советот за безбедност ги образложи мерките за справување со енергетската криза која престои во наредниот период.

-Ова е ужасно тешка ситуација и немам намера тоа да го правдам. Оваа есен, зима, и пролет е најтешка во повоената историја на државата, планот е готов, а се работи и на нов енергетски план и план за максимално зголемување на домашното производство на храна, нагласи Ковачевски.

Тој потенцираше дека е обезбеден јаглен за РЕК Битола и РЕК Осломеј, мазут за ТЕЦ Неготино и ТЕЦ Битола, како и дизел гориво и дополнителна електрична енергија. Тоа го разговарал изминатите месеци со државниците со кои се среќавал, како и деновиве во Белград и Софија.

-Ќе го зголемиме домашното производство за 25 проценти и ќе ја субвенционираме цената на струјата за граѓаните. Ќе го вклучиме третиот блок на РЕК Битола, вториот котел на ТЕЦ Неготино, гасната централа ТЕ-ТО во Скопје, сите хидроцентрали како и обновливи извори на електрична енергија, соларни, на ветер и вода, за да може на граѓаните и на малите бизниси од први октомври до 1 април да им обезбедиме најниска цена на електричната енергија, ќе ја задржиме евтината струја, а на средните и големите бизниси ќе обезбедиме електрична енергија по пониски цени од берзинските кои пак постојано растат, рече Ковачевски.

Тој вети дека за 55.000 домаќинства во Скопје се обезбедува непречено снабдување со топлинска енергија со преземањето на БЕГ од страна на ЕСМ како и дека ќе нема рестрикции во снабдувањето со струја и парно греење.

Премиерот апелираше да се престане со копањето на криптовалути, процес кој троши многу струја која пак е субвенционирана.

Извор: Слободен печат