Косово: Не е само „Џавелин“, планираме и други набавки за засилување на воените капацитети!

Процесот на трансформација на КБС во сили со воени капацитети – која влезе во шестата година од десетгодишниот план – се одвива според планот, соопшти Министерството за одбрана на Косово, пренесува РСЕ.
Љиридона Гаши, политички советник на министерот за одбрана на Косово, за Радио Слободна Европа вели дека овој процес е веќе во втората фаза од спроведувањето на сеопфатниот план.

Се очекува оваа фаза, која, според неа, е завршена околу 85 отсто, да биде завршена следната година.

„Оваа фаза предвидува зголемување на борбените капацитети. Во овие две години фокусот е повеќе на инвестирање во модерни вооружени системи… бидејќи веќе е објавено барањето на Косово за набавка на ракети Џавелин. Но, ова не е единствениот систем што планираме да го купиме“, рече Гаши.

На 11 јануари администрацијата на американскиот претседател Џо Бајден го информираше Конгресот за предложената продажба на оружје на Косово во рамките на американската програма за продажба на странска војска. Преку оваа американска воена програма, американската влада и странска влада можат да постигнат меѓувладини договори за обезбедување помош во безбедноста.

Барањето на Косово вклучува купување на 246 ракети Javelin FGM-148F и опрема за следење, објави американската Агенција за соработка во одбраната и безбедноста.

Според Законот за контрола на извозот на оружје, Конгресот има 30 дена во овој случај да го разгледа барањето, но не е потребно одобрение.

Овој период е потребен пред да се издаде писмо за одобрение за продажба.

Процесот на трансформација на КБС во Вооружени сили на Косово започна во декември 2018 година, кога Собранието на Косово ги одобри законските измени за промена на мандатот на КБС. Планирано е овој процес да трае десет години, до 2028 година.

Косовските безбедносни сили моментално брои околу 2.500 членови. По преодниот период, оваа бројка се очекува да се зголеми на повеќе од 7.500 и ќе вклучува активни и резервни членови.

Претходно, американската Агенција за соработка во одбраната и безбедноста на 11 јануари објави дека оваа продажба на оружје „ќе ги зајакне долгорочните одбранбени капацитети на Косово за да го заштити својот суверенитет и територијален интегритет и да ги исполни неговите безбедносни барања“.