INFOMAX.MK

Коосновачот на OceanGate, компанијата која го организираше трагичното патување со подморница до потонатиот брод Титаник, сега планира да испрати луѓе на Венера. Гилермо Сонлајн, кој е и основач и претседател на Humans2Venus, во интервју за Insider изјави дека се надева дека неговата нова компанија може да биде домаќин на колонија од 1.000 луѓе на најжешката планета на Сончевиот систем.

Најавата за новиот потфат доаѓа помалку од два месеца откако Стоктон Раш и уште четворица патници загинаа кога подморницата Титан на компанијата имплодираше на длабочина од повеќе од 3.500 метри. Сонлајн ја основал компанијата OceanGate со Раш во 2009 година, а во 2013 година се откажал од контролата врз неа, пишува Independent.

Венера има многу токсична атмосфера

„Заборавете на OceanGate. Заборавете на Титан. Заборавете на Стоктон. Човештвото би можело да биде на работ на голем пробив… (Испраќање луѓе на Венера) е желба, но мислам дека тоа е исто така многу изводливо до 2050 година“, рече тој.

Сонлајн тврди дека новите наоди на НАСА покажуваат дека луѓето потенцијално би можеле да живеат во атмосферата на Венера, која е на околу 50 километри од површината.

Според НАСА, Венера има многу токсична атмосфера исполнета со јаглерод диоксид и трајно е „покриена со дебели, жолтеникави облаци од сулфурна киселина кои ја задржуваат топлината, предизвикувајќи ефект на стаклена градина“. Затоа, се претпоставува дека би било речиси невозможно луѓето да живеат на Венера.

Сепак, Сонлајн верува дека овие пречки може да се надминат преку иновации.

„Кога станува збор за замислување постојан дом за човештвото далеку од Земјата, секогаш ме мачеше еден предизвик. Јас не сум ниту инженер ниту научник, но имам најголема верба во способностите на двете“, се вели на веб-страницата Humans2Venus.

Имплозијата на Титан сè уште е под истрага

„Отсекогаш мислев дека ќе можат да се надминат повеќето предизвици со кои се соочуваме во екстремната средина на вселената: радијација, температура, притисок, храна, вода, воздух за дишење итн. Сето ова може да се надмине“, се вели во извештајот.

Сонлајн жестоко го бранеше Раш од критиките дека покојниот инвеститор игнорирал неколку предупредувања за безбедносни проблеми со Титан.

„Мислам дека тоа не треба да има негативна конотација бидејќи речиси може да се тврди дека тоа е клучен елемент за напредувањето на човештвото. Да немаше такви луѓе, веројатно сите сè уште ќе бевме во пештери“, нагласи тој.

OceanGate со седиште во Еверет објави претходно овој месец дека ги прекинува сите операции.

Катастрофалната имплозија на Титан на 18 јуни и понатаму е под истрага од повеќе поморски власти, вклучително и американската крајбрежна стража, канадскиот одбор за безбедност на транспортот и францускиот одбор за истражување на поморски жртви. Минатиот месец, крајбрежната стража свика Поморски истражен одбор и најави дека ќе одржи јавна расправа откако ќе се утврди причината за дефектот на подморницата.