Левица: Баџанакот на Мицкоски со бугарски фирми добива тендери од општина Струмица

Утрово се соопштени обвинувања против премиерот Христијан Мицкоски дека „ги злоупотребува општините кои тонат во долгови само за богатење на неговото семејство и најблиски пријатели“. Од партијата Левица објавија дека е скандалозно што еден од првите тендери на општина Струмица завршува токму кај, како што велат, фирмата на баџанакот на премиерот.

-Еден од првите тендери после промената на власта во Струмица го доби ,,Шалом – Фуд Груп“, компанија во сопственост на Јорданчо Јанев, инаку баџанак на Христијан Мицкоски.

Левица и претходно има реагирано дека токму Јорданчо Јанев се јавува како донатор на ДПМНЕ со сума од 20.000 евра. Контроверзно е што баџанакот на Мицкоски поседува и фирми кои остваруваат милионски профити во бугарскиот град Петрич. И ВМРО-ДПМНЕ и СДСМ меѓусебно претходно се обвинуваа дека овој мал бугарски град е омилена дестинација за нивните фирми, стои во партиското соопштение.

Левица прашува „дали преку бугарски фирми во сопственост на фамилијата на премиерот се изнесуваат криминално заработени пари? “.

-Дали партијата на Мицкоски се финансира со парите од граѓаните, преку тендери кои завршуваат кај неговиот баџанак – донатор?

За фамилијарните бизниси на премиерот одговор треба да дадат институциите и јавното обвинителство. Очигледно и новата ВД јавна обвинителка која е тесно поврзана со ВМРО-ДПМНЕ е поставена единствено со цел за да нема одговорност за криминалот на оваа гарнитура на власт, истакнуваат од партијата на Димитар Апасиев.

Share on Facebook

Tweet

Follow us

Save