INFOMAX.MK

Лекарската комора донесе одлука за доделување на парична донација во висина од 5 000 евра за настраданите граѓани во земјотресот во Турција. Средствата, како што информираат се уплатени во фондот „Хуманитарна акција“, воспоставен од Центарот за управувањ со катастрофи и вонредни состојб при Министерството за внатрешни работи на Република Турција.

Лекарската комора воедно го поздравува големиот одзив на здравствените работници на повикот за медицинска помош во Турција кој го објави Министерството за здравство и ги охрабрува сите доктори на медицина кои се во можност да помогнат во справувањето со последиците од катастрофалниот земјотрес. Комората изразува длабоко сочувство за жртвите од земјотресот, загуба која никогаш нема да може да се надомести и ја истакнува итната потреба да се помогне. Хуманоста и солидарноста е основен предзнак на лекарската професија, а сега е важен момент кога сите, согласно своите можности, треба тоа да го покажат на дело, се вели во соопштението.

Додаваат дека е испратено и писмо за поддршка до турската Лекарска комора во кое ја искажуваат подготвеноста за помош со ресурсите со кои располага.

Граѓаните и здравствените работници на нашата држава знаат што значи поддршката во вакви моменти, поради тоа што се соочиле со природна катастрофа од ваков вид, земјотресот во Скопје во 1963 година, кога многу наши семејства биле директно засегнати. Во овој момент е најважно да се обединат сите ресурси за помош кои постојат и да се насочат во подрачјата каде е најпотребно. Комората ги следи случувањата и во координација со надлежните институции ќе остане инволвирана во наредните активности за поддршка, порачаа од Комората.