Мацут: Повикувам на смирување на тензиите – насилството не е и не смее да биде лице на демократска земја

Премиерот на Република Србија, Ѓуро Мацут, ги осуди сите форми на насилство и недемократско однесување на неистомислениците и нагласи дека ова не е и не смее да биде лицето на демократска држава, се вели во соопштението од Владата на Србија.

Тој го кажа ова во врска со собирите и немирите на улиците на градовите во Србија во текот на ноќта, како и нападите врз просториите на владејачката политичка партија, и додаде дека насилството не може да реши проблеми или да ги надмине разликите во мислењата и дека тоа е можно исклучиво преку дијалог и почитување на законот.

„Ги повикувам сите политички актери и граѓани да ги смират тензиите. Само преку разум, трпение и меѓусебно почитување можеме да постигнеме мир и стабилност. Државата, во согласност со законите на Република Србија, ќе преземе сите мерки за да обезбеди мир, јавен ред и безбедно движење за сите граѓани, без оглед на нивната политичка или каква било друга припадност“, рече премиерот.

Тој нагласи дека ова не е патот што Србија треба да го следи и додаде дека сите прашања, сите несогласувања, како и одлуките што се однесуваат на иднината на Србија, можат да ги донесуваат исклучиво државните институции и органи, но и на избори, во време и на начин пропишан со закон. Мацут особено нагласи дека припадниците на Министерството за внатрешни работи уште еднаш ја покажаа својата подготвеност и посветеност да ги заштитат граѓаните и да обезбедат јавен ред и мир, како што тоа го прават посветено и одговорно во изминатите девет месеци. „Република Србија останува цврсто посветена на градење демократско општество во кое разликите се решаваат преку аргументи, а не со сила“, рече српскиот премиер.

Share on Facebook

Tweet

Follow us

Save