Меџити: Ако се водиме од кривичните пријави, никој од нас не треба да биде дел од власта

„Ако се водиме од кривичните пријави, никој од нас не треба да биде дел од власта“, искрен е вицепремиерот Изет Меџити, во одговорот на прашањето, зошто предлагаат лица со кривични пријави за директори на институции. Тврди дека новоименуваниот в.д. директор на Државниот завод за индустриска сопственост, Елјеса Незири, против кого има кривична пријава за насилство, всушност бил сведок, а не учесник во таков настан.

Но, во документот до кој дојде Телма, Незири се повикува на испитување во Јавното обвинителство во Скопје во својство на осомничен за кривично дело насилство. Предлогот на „Вреди“, пак, за в.д. директор на велешкиот затвор да биде поставен Ибраим Елези, кој бил осуден на четири години затвор за продажба на наркотици, беше повлечен по реакциите во јавноста.

Меџити тврди и дека владината коалиција е стабилна, најстабилна од 90-тите години до сега, и покрај различните ставови со ЗНАМ. Убеден е дека ќе ги надминат несогласувањата, особено околу Балансерот, за кој министерот Горан Минчев најави промени. Се противат на новата пресметка на процентот на бројот на население од етничките заедници, кој од сега ќе се пресметува само врз основа на резидентното население, односно на населението што живее во државата. Сметаат дека, треба да остане досегашната пракса, во овој процент да влезат и лицата кои живеат во странство.

Но, министерот најави дека нема да преговара за новата методологија, затоа што, со броење на дијаспората е направена злоупотреба и е зголемен процентот за вработување на Албанци во државната администрација на 29,54%.

Share on Facebook

Tweet

Follow us

Save