Муцунски со остра осуда: Рускиот напад со „Орешник“ врз Лавов е непромислена ескалација што го загрозува светот

Шефот на македонската дипломатија, Тимчо Муцунски, денеска преку социјалните мрежи изрази најостра осуда за употребата на руската хиперсонична балистичка ракета „Орешник“ при нападот врз украинскиот град Лавов.

Муцунски го оквалификува овој потег на Москва како „непромислена ескалација“ која не само што ја дестабилизира Украина, туку претставува и директна закана за регионалната и глобалната безбедност.

Во својата реакција, министерот нагласи дека ваквите дејствија дополнително го поткопуваат меѓународниот правен поредок.

„Стоиме рамо до рамо со Украина и ги поддржуваме напорите предводени од САД и Европа за постигнување сеопфатен и траен мир – цел која оваа ескалација само ја поткопува“, истакна Муцунски.

Оваа реакција доаѓа во момент на зголемени тензии на источниот фронт, каде употребата на напредно хиперсонично оружје означува нова, опасна фаза во конфликтот. Македонија, како членка на НАТО, останува доследна на својата политика на поддршка на украинскиот суверенитет и усогласеност со западните сојузници.

Share on Facebook

Tweet

Follow us

Save