„Наместо да се договарате за Нова година, да се слуша вашиот глас, вашата смеа, ни остана само крик и болка“: Потресно обраќање на мајка на „Маршот на ангелите“ во Кочани

Во пресрет на новогодишните празници, кога градовите се китат со светилки и радост, болката на семејствата кои ги изгубија своите најмили во трагичната несреќа во „Пулс“ останува посилно да одекнува од празничната врева. Мајка на едно од загинатите момчиња објави потресно писмо, посветено на својот син и неговите пријатели, кои својата прва Нова година ја „прославуваат“ на небото.

Во пораката која го крши срцето, мајката се присетува дека овие денови требало да поминат во договори за тоа каде младите ќе ја дочекаат најлудата ноќ. Наместо тоа, останаа само тишината и сеќавањето на нивната смеа.

„Требаше овде да се слуша вашиот глас, вашата смеа и љубов. Но, наместо тоа, остана само тишина, крик, болка и солзи. Среќна ви прва небесна Нова година, ангели наши. Славејте како што славевте – радосни и разиграни како таа кобна ноќ,“ пишува таа.

Текстот ја пренесува најтешката реалност за секој родител – посетата на вечните почивалишта наместо заедничката трпеза. Мајката вели дека знае оти најголемата желба, да ги врати децата барем за една прегратка, е невозможна, па затоа упатува друга молба.

„Имаме друга желба до него – да пресуди праведно за вашето прерано заминување. Ако ја исполни таа желба, ќе знаеме дека тој е вистинскиот,“ се вели во пораката, упатувајќи на копнежот за правно и морално разрешување на трагедијата која засекогаш промени десетици животи.

Пораката завршува со лична и болна завет на една мајка кон својот син, замолувајќи го „таму горе“ да им направи забава на ангелите, онака како што знаел да прави овде.

Share on Facebook

Tweet

Follow us

Save