INFOMAX.MK

За светлото име Павел Шатев како наше наследство /За Голготата на македонскиот сонувач /

Македонија е ризница на храбри и заслужни луѓе.
Можеби затоа што ги има премногу: преродбеници, просветители,
револуционери, комити, војводи, партизани, државници, дипломати,
поети, писатели. Времето и историјата покажале дека некои од нив се забораваат,
други биваат маргинилизираат, а трети без причина и објаснување се отфрлуваат.
Најчесто, во најголем број, неоправдано и незаслужено.

Но како да се направи избор за тоа кој ќе биде возвишен, а кој заборавен?

Многупати изборот е погрешен. Овој факт ни го сведочи историјата.

Еден од тие што се најдоа, сосема незаслужно, во немилост на државната власт,

е и последниот гемиџија – Павел Шатев. Без причини и без никаков повод некои темни удбашки сили безочно и нечовечки го понижија и уништија. Без вина, без судење и без пресуда. Тоа беше срамен обид да се тргне Павел Шатев од јавноста и да се избрише од историската сцена. Сетоа тоа се покажа неуспешно. Ќе го паметиме само како удбашко-полициска и државна нечовештина и нехуманост.

Со тек на времето историјата покажа, т.е. пресуди дека Павел Шатев е наш. Македонец. Син на мајка Македонија. И припаѓа на нашата и негова Македонија и на македонскиот народ. Со своето севкупно револуционерно и општествено дело, со сето свое битие и дух. Како Револуционер, Анархист, Гемиџија, Национален деец, Доктор на правни науки, Член на АСНОМ, Член на президиумот на АСНОМ, Дипломат, Државник, Министер , Интелектуалец, Пратеник, Политички емигрант, Писател, Публицист, Историчар, Историограф, Биограф, Документарист и Разузнавач.

ВИСТИНАТА за Шавел Шатев е вистината за слободарското, револуционерно и национално ДЕЛО за Македонија.
Науката потврди дека Шатев е најмакедонскиот актер на двата Илиндена: првиот – Илинден 1903 и Крушевската Република и вториот – НОБ/НОВ и АСНОМ. Со гордост, сега и тука, потврдуваме дека Павел Шатев е колективна и поединечна меморија на македонците, национално благо на Македонија – трајна историска вредност, во национално-политичката свест на македонскиот народ.

Покрај историјата и науката постои и еден друг судија – СОВЕСТА. На нејзе и ги препуштаме сите знајни незнајни протагонисти, јавни и тајни антагонисти, злобни сценаристи и режисери со помрачени умови, кои што се огрешиле кон нашиот Павел Шатев.

После 140 години, констатираме дека Тој денес не е заборавен. Го паметиме, со гордост го чествуваме и му се поклонуваме.

Пишува: Сотир Костов