Одложено рочиштето за Жан Митрев: Ангажирал нови адвокати

Докторот Жан Митрев обвинет за кривично дело “измама” денеска седна на обвинителна клупа, но првото рочиште се одложи бидејќи докторот вчера ангажирал нови бранители.

Претходниот адвокат Стевица Јосифовски на 20 февруари поднел поднесок до судот дека не може да присуствува оти бил на патување. Вчера Митрев го отповикал овој адвокат и ги ангажирал адвокатите Никола Додевски и Никола Лазароров.

Судот и даде време на одбраната да се подготви за до 5 април.

Обвинителката Искра Хаџи Василева го предупреди на злоупотреба на правото на одбрана, а адвокатот порача дека обвинителката врши притисок врз судот и го попречува правото на одбрана.

Обвинението против Жан Митрев и болницата го поднесе Основното јавно обвинителство (ОЈО) Скопје на 10 јануари 2023. Докторот се гони за кривичното дело измама (член 247, став 4 од Кривичниот законик), а е поврзано со лекувањето ковид-пациенти со методот хемофилтрација.

Предметот на обвинението е прикривање на клучните факти за хемофилтрацијата, односно методот бил прикажуван онака како што не смее, дека е алтернатива за лекување од ковид, а всушност не е така. Тоа Митрев го правел и преку многубројни медиумски настапи кои ќе бидат дел од доказите.