Папата Франциск: Рускиот Патријарх Кирил даде поддршка на војната, не може да стане “олтарско момче на Путин”

Папата Франциск изјави дека побарал средба во Москва со рускиот претседател Владимир Путин за да се обиде да ја запре војната во Украина, но засега не добил одговор од надлежните за тоа дали таквата средба е возможна, пишува Ројтерс.

Папата, исто така, за италијанскиот весник „Кориере дела сера“ изјави дека патријархот Кирил од Руската православна црква, кој ѝ даде целосна поддршка на војната, „не може да стане олтарско момче на Путин“.

Франциск, кој ја посети руската амбасада на почетокот на војната, изјави за весникот дека околу три недели по конфликтот, тој побарал од највисокиот дипломат на Ватикан да испрати порака до Путин.

Пораката беше „дека сум подготвен да одам во Москва. Секако, беше неопходно лидерот на Кремљ да дозволи отворање. Се уште не добивме одговор и се уште инсистираме“.

„Се плашам дека Путин не може, и не сака, да ја има оваа средба во овој момент. Но, како не можете да ја спречите толку голема бруталност? Пред 25 години во Руанда го преживеавме истото“, вели тој.

Пред интервјуто, Франциск (85) конкретно не ги спомна Русија или Путин јавно од почетокот на конфликтот на 24 февруари.

Запрашан за патувањето во украинскиот главен град Киев, папата рече дека засега нема такви планови, иако минатиот месец не ја исклучи оваа можност.

„Прво, треба да одам во Москва, прво да се сретнам со Путин. Правам што можам. Путин треба само да ми ја отвори вратата“, рече тој.

Војната во Украина ги затегна односите меѓу Ватикан и Руската православна црква и предизвика раскол меѓу православните христијани ширум светот.

Во интервјуто, Франциск рече дека кога имал 40-минутна видео-конференција со Кирил на 16 март, патријархот поминал половина од неа читајќи од лист хартија „со сите оправдувања за војната“.

Кирил (75) ја гледа војната како бедем против Западот што тој го смета за декадентен, особено поради прифаќањето на хомосексуалноста.

„Ние (папата и Кирил) сме пастири на истиот Божји народ. Затоа мораме да бараме патишта на мирот, да го прекинеме огнот. Патријархот не може да стане олтарско момче на Путин“, рече Франциск.

Папата исто така рече дека кога се сретнал со Виктор Орбан на 21 април, каде унгарскиот премиер му рекол дека „Русите имаат план, дека сè ќе заврши на 9 мај“, мислејќи на годишнината од ослободувањето на Русија на крајот од Втората светска војна.