INFOMAX.MK

Министерот за внатрешни работи, Панче Тошковски, во гостување на ТВ21 се осврна на случајот со полицаецот од граничниот премин „Блаце“, кој не го проверил поранешниот вицепремиер Артан Груби и го пуштил непречено да избега од државата.

„Одделот за внатрешна контрола утврди дека направена е кардинална грешка од полицискиот службеник којшто требало да го запре, да го легитимира, да извести и да постапи по мерки од неговиот надреден во насока на напаствијата коишто ги дало Јавното обвинителство“, рече Тошковски.

Тој повтори дека е поднесена кривична пријава против полицаецот кој дозволил поранешниот вицемпремиер да се случи ова.

„Поднесена е кривична, постапено е од страна на Министерството, не е крив пајакот, како на времето“, додаде Тошковски.

Во однос на камерите на граничниот премин, Тошковски вели дека тоа било „само обид за дефокус од страна на опозицијата“.

„Точно е дека „боди“-камерата на полицискиот службеник не работела и точно е дека отпочната е дисциплинска постапка во однос на надредениот којшто требало да се грижи оваа камера да работи, но точно е и дека од излезот на лицето коешто требало да биде на „стоп-листа“, а не било стопирано, имаме видеозапис и тоа чист“, рече тој.

Министерот рече дека борбата на актуелната власт против криминалот и корупцијата е видлива.

-Сите коишто живеат во Македонија, Албанците, Турците, Власите, Ромите, Србите, Бошњаците и сите други коишто убаво, да речам се убави луѓе, си живеат во оваа Македонија и најголем дел, огромно мнозинство од тие луѓе се чесни луѓе, сакаат ред да има. Гледаат дека има разлика од претходно, тоа е битно. Битно е дека навистина нашата борба против криминалот и корупцијата е видлива, рече Тошковски.