INFOMAX.MK

ЗА ГОДИШНИНАТА ОД СОЛУНСКИТЕ АТЕНТАТИ НА ГЕМИЏИИТЕ (малку познати факти)

Неколку години пред Илинденското востание, Турците ги уцениле главите на револуционерите Мерџанов и Манџуков на 10.000 лири. Овие двајцава, со лажни пасоши издадени на друго име – секој одделно – се упатиле кон Цариград, со намера да направат атентат врз султанот Абдул Хамид II. Револверите им стигнале преку руски дипломатски куфер. Таму, случајно, дознаваат дека некој терорист-емисар на ВМРО ги барал низ градот за да ги ликвидира и да ја подигне наградата од властите!?

Во припомош, Мерџанов избезумен му праќа писмо, преку Австриската пошта, на велешанецот-гемиџија Јордан Поп-Јорданов ОРЦЕТО од Солунскиот анархистички кружок (брат на опеаниот Миле Поп-Јорданов). Овој, пошто знаел дека со сељаците треба сељачки, а со интелектуалците интелектуално, ни-две ни-три му иде директно у ненајавена ноќна посета на ‘неоврховистот’, професорот Христо Матов – тогашен член на ЦК од десното (бугарофилско) крило на ВМРО и елегантно му кажуе два реда муабет, у четири очи:

– „Ние ве знаеме и ве познаваме сите вас кои го сочинувате Централниот комитет на Организацијата. Вие нас не нè знаете кои сме и колку сме. Ако по втор пат се обидете да организирате убиство на било кој од нашите истомисленици во Цариград, ќе ве испотепаме сите до еден, како глувци“!