INFOMAX.MK

Од денеска почнуваат подготвителните активности за изведување на вежбата „Swift Response 24”, што е во рамки на кампањата на вежби „DEFENDER 24“ кои се во организација на командата на вооружените сили на САД за Европа и Африка „USAREUR-AF”, а се изведуваат секоја година на тлото на Европа, соопштија од Армијата на Република Македонија.

Делот од вежбата „Swift Response 24” што ќе се одвива на АП Криволак во период од 05.05 до 29.05.2024 година, се состои од вежбовни активности на терен со изведување на одделенски и водни боеви гаѓања, како и во воздушниот простор со воздухоплови, беспилотни летала и изведување на падобрански скокови.

– Вежбата за нас има значење во однос на потврдување на капацитетите на АП „Криволак“, подобрување на интероперабилноста и оспособеноста за борбено сервисна подршка на сојузничките вооружени сили во изведување на овој вид на операции. Воедно, интероперабилноста и вежбите како „Swift Response“ овозможуваат одржување на потребното ниво на подготвеност и го истакнуваат силното сојузништво во НАТО Алијансата, се наведува во соопштението од Армијата.

Активностите за подготовка, меѓу кои пристигнување на персонал и потребни материјални средства по копнен и воздушен пат, како и вежбовните активности на терен, се додава во соопштението, се одобрени со одлуката од 14 седница на Владата на Република Македонија и се целосно координирани со сите надлежни институции согласно пропишаните процедури.