INFOMAX.MK

Американскиот претседател Џо Бајден најави дека ќе води кампања за демократската кандидатка Камала Харис во Пенсилванија, клучна држава на претстојните претседателски избори во ноември.

Бајден ова го изјави во интервју за Си-Би-Ес, што е негово прво интервју откако на крајот на јули објави дека ќе се повлече од претседателската трка, пренесе Ројтерс.

Харис води пред републиканскиот кандидат Доналд Трамп за четири процентни поени во Пенсилванија и во две други клучни сојузни држави, Висконсин и Мичиген, според анкетите на Њујорк Тајмс и Колеџот Сиена објавени во саботата.

На прашањето дали ќе води кампања за Харис, Бајден одговори потврдно.

Бајден рече дека тој и гувернерот на Пенсилванија Џош Шапиро работат на предизборна турнеја во Пенсилванија.

„Тој е мој тип на момче, тој е реален, паметен е, го познавам неколку децении. Мислам дека тоа е фантастичен тим“, рече Бајден.

Бајден, исто така, предупреди дека Трамп и неговите поддржувачи нема да дозволат мирен трансфер на власта на Камала Харис.

„Тој го мисли она што го кажува, иако не секогаш го сфаќаме сериозно. Тој вели дека ќе пролее крв ако изгуби, изборите ќе бидат украдени. Не можете да ја сакате својата земја само кога ќе победите“, рече Бајден.

Да потсетиме, Бајден на 22 јули официјално објави дека се повлекува од трката за претседател на САД. Веднаш потоа тој и даде целосна поддршка на својата потпретседателка, Камала Харис, која ја доби номинацијата на Демократската партија.

President Biden sits down with CBS News chief election & campaign correspondent @costareports for his first interview since announcing his withdrawal from the presidential race. He talks about his decision and his family; his support of the Harris-Walz ticket; and what he sees as… pic.twitter.com/njNECYJVCV

— CBS Sunday Morning 🌞 (@CBSSunday) August 11, 2024