Прекинот на огнот во Украина, во оваа фаза, е нереален

Прекинот на огнот во Украина е нереален „во оваа фаза“, изјави постојаниот претставник на Русија во ОН, Василиј Небензија.
„Имавме обид за ограничен прекин на огнот поврзан со енергетската инфраструктура, што украинската страна не го почитуваше. Во овие околности, да се зборува за прекин на огнот во оваа фаза е едноставно нереално“, изјави Небензија за новинарите по консултациите на Советот за безбедност на ОН зад затворени врати.

Тој нагласи дека усвојувањето на документот на Советот за безбедност на ОН за поддршка на евентуалниот прекин на огнот во Украина ќе зависи од условите на прекинот на огнот.
„Веќе имаме резолуција за прекин на огнот, која беше усвоена на иницијатива на САД. Ќе видиме што точно треба да се направи во Советот за безбедност ако постигнеме некаков договор. Се зависи од условите на евентуалниот прекин на огнот и јазикот на документот“, објасни тој.
Американскиот претседател Доналд Трамп претходно изјави дека очекува Москва да одговори на неговиот предлог за прекин на огнот во Украина во наредните денови и не ја исклучи можноста за дополнителни трговски мерки во случај да нема одговор.

Претседателите на Русија и на САД, Владимир Путин и Доналд Трамп, разговараа телефонски на 18 март. Путин го поддржа предлогот на Трамп страните во конфликтот во Украина да се воздржат од напади на објекти на енергетската инфраструктура 30 дена. Зеленски исто така изјави дека поддржува одбивање напади врз енергетскиот сектор.

Share on Facebook

Tweet

Follow us

Save