Радев демантира: Бугарија нема нуклеарно оружје, тоа се шпекулации

Во Бугарија дефинитивно нема нуклеарно оружје, тоа се шпекулации, изјави претседателот Румен Радев во селото Скрут во врска со американските воени ловци кои пристигнаа во Бугарија за да го заштитат воздушниот простор.

Ова е веста на денот од Република Бугарија, избрана на Бугарската телеграфска агенција (БТА) за објавување од МИА, согласно Договорот за размена на информациии професионална соработка, кој предвидува секој ден националните информативни агенции на Македонија и Бугарија да разменуваат директно избрана од другата агенција вест на денот на соодветната земја, а другата агенција да ја објави на својот интернет сајт без промени со изрично посочување и цитирање на партнерот како извор.

„Овие ловци доаѓаат овде најмногу за да можат да спроведат заеднички активности за обука со бугарските воздухопловни сили и да помогнат во зајакнувањето на воздушната полиција, за заштита на воздушниот простор. И не може да станува збор за нуклеарно оружје”, истакна шефот на државата.

Претседателот Румен Радев претходно во текот на денот учествуваше на откривањето и осветувањето на воениот споменик на војниците од 11-та Македонска пешадиска дивизија под врвот Тумба на планината Беласица.

Националната меморија и достоинството не се наследуваат, тие се одржуваат секој ден. Но, ние денеска продолжуваме да ги браниме заветите на оние кои ги дадоа животите за Бугарија, изјави претседателот Румен Радев во својот говор за време на откривањето на споменикот.

„Пред повеќе од еден век, водени од светиот идеал за обединета и независна Бугарија, илјадници бугарски доброволци од Македонија се приклучија на дивизијата да земат оружје во одбрана на својата татковина. Падините на прекрасната Беласица засолниле многу од нив. Уште тогаш нивните соборци го обележаа патот на дивизијата и местата на смртта на хероите со споменици, спомен-чешми и едноставни крстови, вклучително и овде во областа Тумба. За жал, перипетиите на времето и не една злонамерна рака варварски избришаа многу од овие места. Охрабрувачки е што денес се повеќе ја откриваме нашата должност кон нашите предци”, им порача шефот на државата на присутните.

Румен Радев изрази благодарност до сите институции и поединци кои придонесоа за изградбата на спомен-обележјето.

Најголемата чест за жртвата е таа да не биде заборавена, истакна шефот на државата.

Убеден сум дека овој споменик ќе ги преживее сите предизвици на времето, додаде тој.

На свеченоста присуствуваа и градоначалникот на Петрич Димитар Брачков и претставници на локалните власти, пратеници и бугарската војска.

Извор: МИА/БТА