Револуционерен потег: За првпат човек доби бубрег од генетски модифицирана свиња

62-годишниот Ричард Слејман, кој боледувал од краен стадиум на бубрежна болест, стана првиот човек кој добил нов бубрег од генетски модифицирана свиња, тврдат лекарите од Општата болница во Масачусетс во Бостон.
Четиричасовната операција на трансплантација, извршена на 16 март, „означува голема пресвртница во потрагата за обезбедување полесно достапни органи за пациентите“, се вели во соопштението на болницата, пренесе Ројтерс.

Лекарите од Општата болница во Масачусетс изјавија за Њујорк Тајмс дека изгледа дека новиот бубрег на Слејман е функционален и дека може да ја запре дијализата, пишува Форбс.
Бубрегот го обезбеди eGenesis од Кембриџ, Масачусетс, а Слејман добро закрепнува и се очекува наскоро да биде отпуштен, иако лекарите ќе го следат за да се уверат дека нема знаци на отфрлање на органот, соопшти болницата.

„Го гледав тоа не само како начин да ми помогне, туку и како начин да им дадам надеж на илјадниците луѓе на кои им е потребна трансплантација за да преживеат“, рече Слејман во изјавата објавена од болницата, пренесуваат медиумите.

Share on Facebook

Tweet

Follow us

Save