INFOMAX.MK

Првиот впечаток е дека овој вирус нема способност лесно да се префрли од човек на ловек, поради што ризикот на национално, регионално и светско ниво е низок, објави СЗО.

Педесет и шест годишна жена од Гвангдонг во Кина е првата регистрирана жртва од вирусот на птичјиот грип Х3Н8 кај човек. Овој вирус бил регистриран во 2002 година кај дива патка во Северна Америка, а откриен е и кај коњи, кучиња и фоки, но никогаш досега кај човек.

Жената од Гвангдонг, која починала пред еден месец, се разболела на 22 февруари. На 3 март била примена во болница со тешко воспаление на белите дробови, а починала на 16 март, потврди Светската здравствена организација.

– Пациентката имаше повеќе тешки состојби. Таа била изложена на живина пред да се развие болеста и долго време живеела покрај птици во својот дом. Ниту едно лице со кое жената било во близок контакт не развило симптоми ниту било заразено во времето на известување – објави СЗО.

Долготрајниот престој во директен контакт со птици сигурно е битен фактор за „прескокнувањето“ на разните типови на вирусот на птичјиот грип, но потребни се дополнителни истражувања за да се утврди дали Х3Н8 се разликува од сродните вируси.

Во април и во мај биле регистрирани првите луѓе заразени од Х3Н8, исто така во Кина – едниот пациент лесно заздравел, а другиот бил тешко болен. И тие биле долготрајно во директен допир со птици.

– Првиот впечаток е дека овој вирус нема способност лесно да се префрли од човек на ловек, поради што ризикот на национално, регионално и светско ниво е низок. Сепак, поради природата на постојано развивање на вирусите на грип, СЗО ја истакнува важноста внимателно да се следат сите случаи за да се утврдат виролошки, епидемиолошки и клинички промени поврзани со вирусите на грип што циркулираат и може да ги загрозат здравјето на луѓето или на животните – предупредува Светската здравствена организација.