Русија ќе оди до крај: Не дозволува влегување на Украина во НАТО

Русија ќе инсистира НАТО јавно да објави дека одбива да ја прифати Украина во своите редови, изјави шефот на руската делегација на преговорите за воена безбедност и контрола на оружјето во Виена, Константин Гаврилов.

„Киев, од своја страна, мора да го прогласи својот неутрален, неврзан статус, како што е предвидено во Декларацијата за државен суверенитет на Украина од 16 јули 1990 година“, рече Гаврилов на пленарната седница на Форумот за безбедносна соработка на ОБСЕ.

Во декември 2014 година, Врховната Рада на Украина измени два закони, откажувајќи се од неврзаниот статус на државата. Во февруари 2019 година, украинскиот парламент ги усвои амандманите на уставот, во кои се наведува курсот на земјата кон ЕУ и НАТО. Украина стана шестата земја што доби статус на зајакнат партнер од НАТО.

На 17 декември 2021 година, Министерството за надворешни работи на Русија објави нацрт-договори со САД за безбедносни гаранции, како и договори за мерки за обезбедување на безбедноста на Русија и земјите-членки на Северноатлантската алијанса.

Документот, меѓу другото, вклучува одредби за нераспоредување на ракети со среден и краток дострел во меѓусебен дострел, откажување од натамошното проширување на НАТО на сметка на поранешните советски републики и намалување на бројот на воени вежби. Кон крајот на јануари, САД и НАТО испратија писмени одговори на Москва на руските предлози за безбедносни гаранции.

Организацијата на Северноатлантскиот договор одби да го исполни барањето на Русија и да го одбие членството на Киев во Алијансата. Москва постојано предупредуваше дека распоредувањето на силите на НАТО во Украина ќе се смета за безбедносна закана за Русија.

Share on Facebook

Tweet

Follow us

Save