Силна снежна бура создава хаос низ Европа – Откажани летови, затворени аеродроми и прекини на струја

Европа се соочува со екстремни зимски услови кои предизвикаа сериозни нарушувања во авио-сообраќајот, железницата и секојдневниот живот на северот и западот на континентот. Од Британија до Скандинавија, снежните врнежи и ледениот дожд значително ја влошија ситуацијата во инфраструктурата и сообраќајот.

Во Германија, повеќе од 100 летови беа откажани на главните аеродроми. Во Франкфурт се откажани 120 летови од вкупно 1.090 планирани, а во Минхен – 35. „Одмрзнувањето на авионите и чистењето на пистите траат подолго, а слабата видливост го отежнува авионскиот сообраќај“, соопштија аеродромските служби.

Британските аеродроми, меѓу кои и тие во Ливерпул и Манчестер, беа привремено затворени, додека Бирмингем прекина со работа на неколку часа. Многу рурални области се отсечени, со снежни наноси до 40 сантиметри. Прекини во снабдувањето со струја погодија повеќе градови, вклучувајќи ги Бирмингем, Бристол и Кардиф.

На северот, Скандинавија се подготвува за екстремно снежно невреме кое може да донесе и до 80 сантиметри снег во јужна Норвешка и централна Шведска, зголемувајќи го ризикот од лавини.

Сателитските снимки го следат развојот на бурата, која од Атлантикот се движи кон Северното Море и јужна Скандинавија. Метеоролозите предупредуваат дека временските неприлики ќе продолжат во наредните денови.

Share on Facebook

Tweet

Follow us

Save