Трамп: Украина не ја таргетирала резиденцијата на Путин во нападот со дрон

Претседателот на Соединетите Американски Држави Доналд Трамп изјави дека американските власти утврдиле оти Украина не ја таргетирала резиденцијата на рускиот претседател Владимир Путин во наводниот напад со дрон минатата недела.

Трамп посочи дека „нешто се случило во близина“ на резиденцијата на Путин, но дека американските служби не пронашле докази дека таа била директна цел. „Не верувам дека тој напад се случил. Не веруваме дека се случил, откако можевме да провериме“, изјави Трамп пред новинарите за време на летот кон Вашингтон.

Претходно, рускиот министер за надворешни работи Сергеј Лавров тврдеше дека Украина лансирала повеќе дронови кон државната резиденција на Путин во Новгородската област, на северозападот од Русија, но дека тие биле неутрализирани од руските одбранбени системи. Лавров го обвини Киев дека го извршил нападот во чувствителен момент, додека траеле интензивни преговори за прекин на војната.

Еден ден пред овие тврдења, украинскиот претседател Володимир Зеленски се сретна со Трамп на Флорида, каде што разговарале за мировен план од 20 точки на американската администрација. Набргу потоа, Зеленски ги демантираше обвинувањата од Кремљ.

Европски официјални лица претходно оценија дека наводите за напад врз резиденцијата на Путин претставуваат обид на Москва да ги саботира мировните напори. Американскиот весник The Wall Street Journal кон крајот на минатата година објави, повикувајќи се на неименуван американски функционер, дека CIA утврдила оти немало обид за напад врз Путин.

Share on Facebook

Tweet

Follow us

Save