Трендафилов: Митревски се продава во ВМРО-ДПМНЕ за минималната плата повторно да биде 8050 денари

Живко Митревски е поранешен претседател и ќе остане запаметен како претседател на ССМ кој го потпиша Општиот колективен договор и направи измени за работниците да можат да земат еден денар регрес, беше одговорот на првиот човек на ССМ Слободан Трендафилов на прашање на Локално за нападите и наводите на поранешниот прв човек на ССМ Митревски дека сегашното раководство нема легитимитет, на денешната прес конференција во седиштето на сојузот на синдикати.

„Затоа Живко Митревски е претходен претседател, затоа што потпиша Општ колективен договор и направи измени за работниците да можат да земат еден денар регрес. Сега, истиот тој се продава во ВМРО-ДПМНЕ за минималната плата повторно да биде 8050 денари.“ изјави првиот човек на ССМ.

Тој додаде дека синдикатот не смее да биде подложен на политички влијанија и дека работничките права треба да бидат заштитени од манипулации и притисоци.

„Ако сакаат такви лидери, нека молат и коленичат пред политичките фигури во државата, со единствена цел – владата да ги постави како лидери на Сојузот на синдикати на Македонија. Ќе потсетам дека во работничкиот дом и во ССМ е забрането пушењето“, нагласи Трендафилов, алудирајќи на принципите и правилата што важат во синдикалното движење.

Оваа изјава доаѓа во момент кога ССМ се соочува со нови предизвици и притисоци од страна на владата во однос на покачувањето на минималната плата за 6000 денари, момент кој предизвика сериозна расправа во јавноста и несогласувања помеѓу владејачкото мнозинство и сојузот на синдикати.

Share on Facebook

Tweet

Follow us

Save