Украина ги отфрла обвинувањата за егзекуција на руските затвореници

Украинскиот комесар за човекови права во неделата ги отфрли обвинувањата на Москва за „егзекуција“ на руски воени затвореници, истакнувајќи дека видео снимката од инцидентот покажува дека украинските војници се бранат од Русите кои се преправале дека се предаваат.

Комесарот Дмитро Лубинец рече дека „делови од видеото“ презентирани од Москва како доказ дека Киев егзекутирал руски воени затвореници всушност покажуваат руски војници кои, додека „се преправале дека се предале“, всушност „извршиле воено злосторство пукајќи во украинските вооружени сили“.

Руските војници убиени во тој инцидент „затоа не можат да се сметаат за воени заробеници“, додаде тој на Телеграм.

„Оние кои сакаат да ја користат заштитата на меѓународните закони за да убиваат, мора да бидат казнети“, рече тој.

Русија во петокот ја обвини Украина дека егзекутирала повеќе од десетина нејзини војници кои го положиле оружјето, нарекувајќи го „воено злосторство“, врз основа на видеата објавени на социјалните мрежи.

На првото видео, кое се чини дека е снимено од украински војник во борбената зона, десетина војници, наводно Руси, излегуваат еден по еден од засолниште, со кренати раце и легнуваат на земја по команда на Украинците кои имаат вперено оружје кон нив.

Снимката нагло завршува во моментот кога од засолништето излегува последната темна силуета, кога се слушаат истрели.

Друга снимка од дрон покажува десетина тела како лежат во локва крв, едно со дупка од куршум во главата.

АФП не можеше да ја потврди автентичноста на снимката од независен извор.

Руското Министерство за одбрана во петокот објави дека тие покажуваат „намерно и систематско убивање“ на руски воени заробеници.

Рускиот истражен комитет објави дека спроведува истрага.