Улуташ: КФОР внимателно ги следи сите безбедносни настани во регионот

Командантот на КФОР Озкан Улуташ изјави дека редовно комуницира со сите меѓународни и домашни актери, вклучително и со началникот на Генералштабот на вооружените сили на Србија, и посочи дека кога станува збор за безбедносната ситуација на северот на Косово, нема да шпекулираат за кое било идно сценарио, но дека КФОР внимателно ги следи сите безбедносни настани во регионот. Тој изјави дека укинувањето на српскиот динар може да ја влоши ситуацијата, но дека дополнително нема да коментира, бидејќи тоа е политичко прашање.
Улуташ за Дукаџини посочи дека негов приоритет е подобрување на комуникацијата и координацијата заснована на доверба.

„Поставив приоритет да ја охрабрам комуникацијата и координацијата заснована на доверба. Кфор редовно и транспарентно комуницира со сите меѓународни и локални актери“, рече тој.

Тој додаде дека неговата работа подразбира комуникација со многу соговорници.

„Како командант на КФОР имам средби со многу соговорници, вклучително и претставници на косовските институции и косовските безбедносни организации, началникот на Генералштабот на вооружените сили на Србија, шефот на Мисијата на ЕУ за владеење на правото (ЕУЛЕКС), и претставници на Обединетите нации, Организацијата за безбедност и соработка во Европа (ОБСЕ) и дипломатската заедница“, рече Улуташ.

Кога станува збор за можна ескалација на северот на Косово, командантот на КФОР истакна дека нема да шпекулира за никакво идно сценарио, туку дека го следи секој безбедносен развој.

„Нема да шпекулирам за ниту едно идно сценарио. Ние внимателно ги следиме сите релевантни безбедносни случувања во регионот. КФОР останува фокусиран на спроведувањето на својот мандат на ОН, врз основа на Резолуцијата 1244 на Советот за безбедност на ОН од 1999 година, која треба да обезбеди мирна и безбедна средина за сите заедници кои живеат на Косово, како и слободата на движење, во секое време и на непристрасен начин“, додаде Улуташ.

Тој, исто така, рече дека КФОР во моментов има околу 4.500 војници во Косово од 28 земји, вклучувајќи ги и сојузниците и партнерите на НАТО.

Улуташ изјави и дека мировните сили на КФОР се подготвени да се соочат со секоја ситуација.

„Кфор има брзо, флексибилно и видливо присуство низ Косово. Остануваме будни и фокусирани на секојдневното и непристрасно спроведување на нашата мисија на ОН. Ние сме добро опремени и подготвени да се соочиме со секоја ситуација што може да влијае на безбедносната средина и да продолжиме да работиме во тесна соработка и координација со косовската полиција и ЕУЛЕКС“, рече тој.