Фон дер Лајен: Соборување на руски борбени авиони во просторот на НАТО и ЕУ е опција која ја разгледуваме

Претседателката на Европската комисија (ЕК), Урсула фон дер Лајен изјави дека се разгледува опција за соборување на руски борбени авиони кои влегуваат во воздушниот простор на НАТО и на Европската Унија (ЕУ).

„Мое мислење е дека мора да го браниме секој квадратен сантиметар од територијата, а тоа значи дека во случај на упад во воздушниот простор, по предупредувањето, откако бевме многу јасни, секако опцијата за соборување на борбениот авион е на маса“, изјави Фон дер Лајен во интервју за „Си-Ен-Ен“.

Според неа, Русија ја тестира Европа на сите полиња.

„Тоа е хибридна војна штоја доживуваме веќе со години, а која ја води Русија против демократиите на Европската Унија и останатите. И затоа ние се бориме со сето тоа на различни полиња. И како што реков, тоа е одлука на НАТО, но би била многу јасна, не чепкајте ја нашата територија“, рече претседателката на ЕК.

Претседателот на САД, Доналд Трамп, во вторникот по состанокот со неговиот украински колега, Володимир Зеленски, на маргините на Генералното Собрание на Обединетите Нации, рече дека земјите на НАТО треба да соборуваат руски авиони кои влегуваат во нивниот воздушен простор.

Share on Facebook

Tweet

Follow us

Save