Фон дер Лајен: Украина постигна напредок бидејќи Европа е во нивните срца, а истото важи и за Албанија и Македонија

Поголемиот дел од напредокот на Украина во ЕУ реформите е постигнат затоа што народот ја има Европа во своите срца и своите умови. Истото важи и за нашите пријатели во Албанија, во Северна Македонија и низ Западен Балкан. Важи и за Молдавија и Грузија, кои исто така побараа да се приклучат на нашата Унија. Ветерот на промени дува низ нашиот континент, порача, меѓу другото претседателката на Европската Комисија Урсула фон дер Лајен во нејзиниот говор на десеттиот „Athens democracy forum“, јави дописничката на МИА од Атина.

Детално говореше за демократијата и демократските вредности, истакнувајќи дека со рускиот напад врз Украина се води „војна на автократијата против демократијата“, но и изрази длабоко убедување дека „демократијата ќе надвладее“.

Рече дека сите демократии се „работа во тек, вклучително и внатрешноста на ЕУ, изградена врз ветувањето за единство во различноста“ и додаде дека сепак ова ветување не е целосно постигнато.

Говореше за четири приоритети на кои е потребно фокусирање: новите закани, повеќекратните кризи, обидите за нови граници и идните генерации.

За новите закани рече дека „воените бродови и војниците повеќе не се единственото оружје во рацете на странските автократи“, туку и дезинформациите, како и сајбер нападите, што „исто така се дел од нивната војна против демократијата“.

Во однос на повеќекратните кризи, потсети на пандемијата, на здравствената криза и успешната набавка на вакцини, се осврна на реакцијата на Унијата „со брзина на светлината на рускиот напад против Украина, со најголемиот пакет санкции во историјата“ и порача дека „демократиите можат да постигнат резултат ако дејствуваме обединето“.

-Нападот на Путин против Украина е обид да се смени текот на историјата и да се запре долгиот пат на демократијата, истакна претседателката на ЕК објаснувајќи го третиот приоритет и додаде дека не се работи само за војната на Русија против Украина, туку и на низа други демократии во светот.

Како четврти приоритет посочи дека „никогаш не треба да заборавиме дека нашите демократии им припаѓаат на идните генерации“.

Share on Facebook

Tweet

Follow us

Save