INFOMAX.MK

Парковите во општина Аеродром пропаѓаат, се жалат жители на општината кои до нашата редакција доставија фотографии од паркот на Детската улица во населбата Ново Лисиче, каде како што можете да забележите на фотографиите тревата е исушена, а просторите за цвеќиња се празни и со исушени растенија во нив.

Граѓаните велат дека во ваква катастрофална состојба не е само овој парк, туку и најголемиот број паркови под надлежност на Општината Аеродром, а исто така додаваат дека општинските власти се запознаени со проблемот и со барањата на граѓаните за соодветна грижа за парковите низ општината, но одговор на нивните барања нема.

Го прашавме градоначалникот на Општина Аеродром, Тимчо Муцунски, за коментар за состојбата на парковите низ општината со која тој раководи, но и ние, ккао и граѓаните, не добивме одговор зошто парковите се оставени на милост и немилост на временските услови.

Инаку, за време на предизборната кампања, Муцунски постојано повторуваше дека е време за чист, зелен и безбеден Аеродром, со што и ја доби довербата на граѓаните. За жал, ветувањето за зелен Аеродром не го исполнува на дело.